Комплиментите за Пелистер, бодовите за противниците

ИСТА ПРИКАЗНА НА СИТЕ ГОСТУВАЊА НА ПЕЛИСТЕРЦИ ОВАА ФУДБАЛСКА ЕСЕН

Многупати оваа фудбалска есен по истото сценарио од гостувањата фудбалерите на Пелистер се враќаа со наведнати глави и со полна „торба„ пофалби за добрата игра, организираноста и слично. Но зелените рушат негативни рекорди кога се во прашање мечевите надвор од Битола.
И ако под Тумбе кафе во две сезони во Втората и Првата лига, Пелистер има само по еден пораз во сезона од Еуромилк и Металург и од Вардар во националниот Куп, на гости скорот е катастрофален. Секогаш битолчани мака мачеле да пронајдат баланс меѓу натпреварите дома и во гости, но ваква разлика како оваа сезона до сега не се случила. Дури и пред две сезони кога Пелистер испадна од Првата лига, знаеше да освои по некој бод кога игра надвор од своето „буниште„. Така и во неделата во Кичево, од меч во кој екипата на Димов ги контролираше работите и беше до некаде и опасен по голот на Пашовски, мечот се претвори во пораз во само една грешка. Пречесто на сличен начин Пелистер губеше во Скопје од Работнички и во Штип со нереализирани пенали, од Вардар во Скопје, кога прими голови во последните 5-6 минути и слично.

                В недела следува последниот домашен меч со Тетекс и бодовите се приоритет и мечот од битолскиот табор го подготвуваат како финале. Првиот дуел со „штофарите„ беше еден од оние, во кој тимот комплетно потрфли и сега сите под Тумбе кафе се желни за реванш. Според статистиката Пелистер мака мачи да постигне гол и реализацијата и на напаѓачите и на фудбалерите кои се придодаваат од втор план загрижува. Од мечевите со Тетекс и Ренова директно зависи како Пелистер ќе биде стациониран пред зимската пауза, а потоа стратегијата е јасна. Тимот мора да се мобилизира во борба за опстанок или во најмала мерка за избегнување на директно испаѓање од лигата. Во тој контекст сигурно ќе има промени и во играчкиот кадар и на клупата, бидејќи Димов е само привремено решение уште два натпревари, а потоа ќе биде поставен нов шеф на стручниот штаб. По денешниот слободен ден, утре зелените пак ќе бидат во тренажен процес и мислите им се насочени само на неделниот натпревар.

Главевски и Стефан Магловски „пожолтени„ со Тетекс

                Грижите на стручниот штаб на Пелистер на чело со Миле Димов и неговите помошници Стерјов и Ванчо Мицевски се уште поголеми, бидејќи за последниот домашен меч во 2012, пелистерци ќе бидат без најдобриот стрелец Благојче Главевски и без Стефан Магловски кои мора да паузираат заради акумулација на жолти картони. Неизвесно е дали Благојче Рутевски ќе се опорави за мечот со Тетекс наредниот викенд.