Одлична есен за фудбалерките на Топ-гол

Заврши полусезоната во нашиот женски фудбалски шампионат со солиден учинок за битолската екипа Топ-гол

Заврши есенскиот дел од сезоната 2012/13 за фудбалерките на Топ гол, кои ќе презимат на шестото место на табелата од вкупно десет екипи. Со четири победи, еден нерешен резултат и еден пораз од лидерот, а бодовното салдо на битолчанки е 13 бода, но имаат еден натпревар помалку кој поради лошите временски услови ќе се одигра напролет.
Гол разликата на оваа полусезона изнесува +5, 15 постигнати и 10 примени голови. Во 8 официјални  натпревари за Топ гол вкупно настапија 20 фудбалерки, сите од Битола.

                „Ова е одлична полусезона и во споредба со минатиот есенски дел во сите параметри сме подобри. За разлика од минатиот во овој дел остваривме 6 бодови повеќе, имаме подобра гол разлика и играа повеќе фудбалерки. Најмногу ме радува тоа што нашата форма и квалитет како поединечно така и екипно е на многу повисоко ниво. Ние сме екипа  која  две години само двапати е поразена на домашен терен и тоа од лидерот, а сега победуваме и на гостински терен и тоа со екипи кои се во горниот дел на табелата. Имавме и порази, но и од нив извлековме поуки кои ќе ни помогнат во идните натпревари. Наш приоритет е развој на млади фудбалерки и во тоа успеавме во есенските квалификациски турнири на национално ниво во У17, У19 и А-селекција. Топ гол исфрли 8 репрезентативки, а капитенот на У17 на Македонија е од нашите редови. Ако на ова го додадеме и тоа дека ние сме една од најмладите екипи во Македонија ова до сега е огромен успех. Стручниот штаб ќе направи детална анализа за оваа полусезона, а до крајот на годината ќе продолжиме со работа, но со намален интензитет и обем и ќе додадеме  активности од забавен карактер„ ни изјави шефот на стручниот тим, Кире Грбевски.